.. مــرت ســنــون ..

مرت سنون

والضحكة الحلوة
تملأ الصدر
إن ضاعت الدمية
أبكيها للفجر
وإن أجدها ألقاها معاتبة
كيف تُقتِ على البعد والهجر !!
ذهبت إلى أمى ..
أمى لما لا تحدثنى دميتى ؟؟
أشكيت إليكِ من سوء رعايتى ؟؟
قالت أمى باسمة :
هذه جماد حبيبتى
لم أفهم وقتها ما معنى جماد
وضعتها أمامى
لما لا تُحدثنى يادميتى ؟؟
لما لا تمسحى دمعتى ؟؟
إنى تهت بين طيات الحياة
وارتضيتك أن تكونِ سفينتى
أو ترفضى ؟!

مرت سنون

وفككت شريط ضفائرى
نمت بروحى خواطرى
وفهمت ما معنى الحياة
وغضضت طرف نظائرى
لفعت نفسى بالحجاب
أعلو بعزه للسحاب
وباتت نفسى راضية
أحميها من عين الذئاب

مرت سنون

أقتنى كراس أسطر داخله
ما يحوى قلبى من حنين
تقبع روحى داخلى
كالطفل السجين

أرتدى الثوب الثلجى
ورأسى متوجة بطوق الياسمين
والوجد يعثو بساحتى

ينهش رموز طفولتى
يستبيح ولا يبين

مرت سنون ......

.. يــامــكــة يــاطــيــبــة يــادوا الــعــيــان ..

السلام عليكم ورحمة الله وبركاته

البنوتات حبيباتى اللى سألوا عنى وعن غيابى بجد وحشتونى كلكم جــــدا ..
ووحشتنى مدونتكم الجميلة والمفيدة ..
وبفكر فيكم كلكم ..
بس لظروف غصب عنى بعيدة عنكم ..
اهم حاجة دعواتكم معايا على طول ..

وجتلكم النهاردة بصور لاحلى مكان فى العالم ..
لآخر عمرة عملتها ودى كانت من فترة قريبة جدا اثناء فترة غيابى ..

لعمرة الاخيرة دى غير أى عمرة ..
تاركة أثر بنفسى بشكل كبير
مش عارفة ليه ؟؟
يمكن علشان كانت فاضية ..
يمكن علشان قعدت أيام أكتر ..
يمكن علشان دعيت فيها دعوات وبان أثر الاستجابة على طول ولطف ارحم الراحمين ..
يمكن علشان اتعرفت هناك على انسانة .. كانت هدية من ربنا ليا ..
وشفت فيها كمية من الاخلاص والرضا بجد عمرى ما شفته قبل كده .. أحسبها على كل خير .. بحبها فى الله حبا جما يشهد ربى ..
يمكن .. يمكن .. يمكن ..
مش عارفة
يامكة .. ياطيبة .. يادوا العيان ..
اشتــقــــــنالك .. والهوى ملانا ..
والله اشتــقــــــنالك..

اسيبكم مع الصور الان

اول حاجة الجبال فى الطريق إلى مكة

المسجد الحرام

المسعى بين الصفا والمروة من الدور الثانى

حمام مكة فى كل مكان .. حيث الأمان

المسجد النبوى

القبة الخضراء تحتها غرفة السيدة عائشة رضى الله عنها وقبرحبيبى الرسول صلى الله عليه وسلم ..

وسيدنا أبو بكر رضى الله عنه ..وسيدنا عمرو بن الخطاب رضى الله عنه ..

أنوارالمدينة فى الثالثة صباحا

شروق المدينة

الشمس وهى لسه طالعة بتشقشق من بين المآذن وبتصبح على المدينة وأهلها

المسجد النبوى من الداخل

مسجد الجمعة .. أول جمعة فى الاسلام أُقيمت فى هذا المسجد

مسجد قباء .. أول مسجد فى الاسلام أسس على التقوى .. الصلاة فيه بأجر عمرة

مدافن البقيع ..

ومدفون فيها سيدنا عثمان رضى الله عنه والسيدة عائشة والسيدة فاطمة رضى الله عنهما وكثير من الصحابى وكل من يموت فى المدينة يدفن هناك ..

اللهم ارزقنى شهادة فى سبيلك وميتة فى بلد رسولك ..

مسجد الغمامة ..

الرسول صلى الله عليه وسلم خرج بأصحابه لصلاة الاستسقاء خارج المدينة فصلوا .. فجاءت غمامة وأمطرت عليهم .. مكان هذا المسجد لذلك سموه بهذا الاسم ..

ولكن للأسف أُغلق بسبب الشيعة وتمسحهم فيه ..

وياريته نافع قاعدين أودمه وبيتمسحوا برده ..

جبل أحد

مدافن شهداء أحد

جبل الرماة

قبر سيدنا حمزة

هذا الجبل ..

هو حدود المسيح الدجال سيصل إلى هذا الجبل ولن يستطيع أن يتعداه وسيصرخ صرخة لأهل المدينة أن يخرجوا منها ليتبعوه وسيخرج سبعون ألف منافق ..

علماء المساحة اتبعوا أحاديث الرسول بالظبط ووجدوا هذا حدوده ..

اللهم إنى نعوذ بك من فتنة المسيح الدجال ..

* ملحوظة الصور كلها من تصويرى أنا وزوجى

اللهم ارزقنا زيارة بيتك أبــــدا
وارزق كل مشتاق
اللهم امين

ودمتم بخير ..

.. عــودة وشــكــر وتــاج ..

معلش ياجماعة الخير إنى غيبت عنكم الفترة اللى فاتت ولكن لظروف خارجة عن إيدى ..

وأم مالك كانت بتوصلنى سؤالكم ..

كل البنوتات وحشتونى بجد ووحشتنى مدونتكم وكتاباتكم القيمة
بجد جزاكن الله كلكن كل خير على السؤال عليا .. سؤالكم أثر فيا جـــدا وخلنى أحس بمدى حبكم وانكم فعلا اخواتى واهلى ..

ربنا يخليكم كلكم يابنوتات والله إنى أحبكن فى الله .. وياريت ما تنسونيش من دعائكم لأنى الفترة الجاية هابقى مشغولة شوية بس هاتابعاكم على اد ما اقدر

أدامكن الله لى ولا حرمنى سؤالكن أبــــــدا ..
ش على ك .. ك على ر .. ر على ا ..
شكرا .. شكرا .. شكرا ..

وكل واحد دلوقتى يصقف الصقفة السباعية ..

والمرة دى هجاوب على تاج إتاخرت فى إجابته جالى من حبيبة قلبى وبنت منطقتى من ناحية الجدعان أوى عاشقة الرومانسية

بسم الله

من أنت ؟ وما الذى تفعله هنا ؟

انا لجين أبو الدهب واحدة مسلمة بتسعى لرضا الله عزوجل وتطبيق سنة الحبيب المصطفى والموت على لا إله إلا الله ..
وهنا جزء من حياتى مهم جدا وبحس اللى هنا اهلى بفضفض معاهم وبحكى معاهم وبحاول انقل لهم جزء من هدفى الأساسى فى الحياة ..

إسرائيل تقصف كل جنوب ممكن بحثا عنك ، أى شمال ستقصد؟

هاروح جـــــــرى على الجنوب وادعى كمان إنى اتقصف ..
هو فى أجمل من الشهادة وشرفها ..

أنت مكلف بحذف حرف من حروف اللغة العربية .. أيها ستختار ولماذا ؟

مش هلغى اى حرف .. علشان دى لغة القرآن الكريم ..
انما لو السؤال خياليا فالحرف اللى هالغيه حرف (( ط )) علشان على طول اعمل فيه إشمام فى النطق فى تسميع القرآن ..

لو قدر لك أن تدخل السجن فما هي القضية التي تتمنى ان تدخل بها إليه؟

قضية دفاع عن الدين ..

بالمناسبة.. منذ متى اكتشفت نفسك؟

اممممممم ..
هو فى حد بيكتشف نفسه !!
لازم حد أكبر وأكثر خبرة هو اللى يكتشف ..
بس ممكن اقول من فترة ثانوى كنت بكتب خواطر أو شعر أو أى شئ بصيغة أدبية وكتير يمدحوها ..

على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

إلى حلمى .. إلى حلمى .. إلى حلمى ..
لأن الناس عمرها ما بترضى .. فلو سلكت الى ما يحلم به البشر علشان ارضيهم عمرى ما هنال رضاهم ..

نحن لا نعيش حياتنا بل نتعلم فيها كيف نعيش ما تعليقك؟

يعينى مش موافقة عليها اوى ..
لأننا بنعيش حياتنا ولكن بداخلها بنتعلم إيه أسلم الطرق للعيش فيها ..

بجملة واحدة فقط أكتب تعريفاً لكل كلمة من الكلمات التالية:

الوطن

ملجأ الأنسان حين تلفظه جميع الأراضى وما أجمله إن أقيم فيه حدود الله ..

الأم

منبع الحنان الذى لا يجف وإن كان يقابله قسوة ..

الليل

له سحر خاص لا يفوقه شئ بالصلاة والدعاء فى جوفه ..

الحب

ما أجمل العيش فى ظل عالمه ..

أمريكا

بالونة كبيرة مليانة هوا شكة بسيطة تفرقعها .. بس ما حدش قادر يشكها ..

المرأة

قارورة .. وأرق ضلع أعوج فى الوجود ..

الصمت

يحمل الكثير من الكلام المعبر ولكن دون صوت

الانترنت

شئ عجيب وجعل العالم الكبير يتجمع فى شاشة صغيرة

أخترمنصباً واتخذ قرارا ؟

رئيس الجمهورية ,,
والقرار إقامة حدود الله فى الأرض ..

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

بالعكس ده مش تغيب ولا حاجة .. ده دليل أكبر على أهميتها ووجودها أنهم أكثر شعرهم كان فى المرأة ..
وصمت المرأة فى الحالات دى لأنها بطبيعتها بتحب تكون مرغوبة ويلفع هذا الحياء ..

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل؟

لا اتفق بالمرة ..
الله الغنى عن هذا الطلب..

إلى أين تمضي كلمات الحب .. بعد أن نقولها؟

إلى ذاكرة المدى الطويل الأبدى الذى لا ينسى ويتكرر ذكرها ..

هل تجد علاقة بشكل أو بآخر بين المرأة وقطاع الطرق ؟

قاطع الطريق ما بيفرقش ما بين امراة او رجل او طفل او عجوز ..
بيكون هدفه السرقة وبس من اى ضحية جايله ..

هذا فراق بيني وبينك .. متى ولمن تقولها ؟

أقولها عند حدوث الخيانة والغدر

وأقولها لأى حد خانى أو غدر بيا ..

كيف هو غداً ؟

الله عزوجل اعلم به ..
ولكن نسأل الله عزوجل الصحة والستر دوما ..

امرر التاج الى

ام البنين
ام البنات
موناليزا
ستيتة حسب الله الحمش
ايمان
اريج
بسمة صلاح
ايمان روحى
منوش
احساس طفلة محبة للرومانسية
جيجى
سلمى محمد
غربتى
ليدى
المصرية وافتخر
القدر وانا
فتافيت ايوشة

وأى حد عايزه ..

ودمتم بخير ..

.. وفــى عــيــن حــاســدِ عــلــبــة كــبــريــت ..

الكام بوست الاخرنين زعلوكوا قلت البوست ده نغير شوية ..

الحسد شئ مذكور فى القرآن والسنة ومسلم بيه ..

من فترة جه على بالى كام موقف حصلوا اودامى وكان فيه الحسد واضح هاقولكم شوية منهم ..

كنا جايبين سفرة جديدة وكنا فرحانين بيها وهى فعلا كانت جميلة .. وخدوا بالكم من كــــــــانت دى ..

جت لنا واحدة قريبتنا علشان تتفرج عليها .. فأول ما شافتها قالت ..

(( أزاز القرص منور وحلو وبيلمع ))

والست ما كملتش 5 دقائق سمعنا .. طق طق طق .. طقطقطقطقطقطق ..

إزاز القرص بتاع السفرة اتقسم فى ساعتها نصين وادشدش عن بكرة أبيه ..

موقف تانى كان زوجى رايح الحج وكان واخد الـ i-mate معاه .. ومش علشان هو هايبقى فاضى مثلا .. لكن لازم على طول يفضل على اتصال بالأنترنت علشان طبيعة شغله ..

فواحد صاحبه شافه .. قاله انت على طول ماشى بالكمبيوتر معاك كده ( كأنه بيلعب مثلا ) وجايب i- mate معاك هنا ..

مافتش يومين الـ i-mate وقع من إيد جوزى على السيراميك وباظ فيه حاجات كتير وصلحنها لكن تبوظ تانى وما رجعش زى ما كان الاول ابدا ولغاية دلوقتى نصلح فيه حاجات وتبوظ لغاية ما يأسنا منه ..

وكنت مرة فى قاعدة وواحدة كانت بتحكى عن خطيب بنتها وعن كرمه وأخلاقه ويابختهم بيه وفى واحدة قاعدة سبحان الله نظرتها حسيت فيه بشئ من الحقد على الكلام .. وفعلا مافيش تلات اسابيع ..
وعرفنا ان البنت حصل لها مشاكل مع خطيبها كتير جدا واحتمال يسيبوا بعض ومن بعد ما كان بيقول لها بادوب فى دباديبك .. بقى مش طايقك يابت انتى وهاسيبك ..

وموقف رابع انا ابن خالتى كان شعره كثيف .. وخدوا بالكم من كـــــــان برده ..
فخالتى كانت واقفة مع واحدة فبتقولها ان ابنى اللى هناك .. قالت لها ابو شعر حلو ده ..
ومن ساعتها شعره بينزل بشكل غريب وبيلف على الدكاترة لغاية دلوقتى ولاقى نفسه دخل فى ادوية ودكاترة ومافيش حاجة نافعة توقف التساقط ..

ومرة جدتى بتحكيلى ان خالتى كانت مخلفة بنوتة جميلة اوى وبدأت تظهر تعبيرات وشها بدرى عن سنها .. فبدأت تضحك .. فعمها كان بيزورهم وشايلها فالبنوتة ضحكت فقال لها انتى بتضحكى كل الضحكة دى ومافيكيش ولا سنة امال لو عندك سنان هاتبقى ضحكتك عاملة ازاى ..
جدتى قالت لى البنت جالها سخونية جامدة بالليل وفضلت السخونية تزداد وفى تالت يوم البنت توفيت ..

واحب احكيلكم بقى على اخر موقف حصل ده من اسبوع ..
انا زوجى مش من النوع اللى له بال يكتب كتير على الكمبيوتر ..
فكنت صاحية من النوم لاقته بيكتب ولقيت كاتبة طويـــلـــــة ..
قلت له هو انت اللى كتبت ده قالى أه ..
قلت له كـــــلـــه ؟؟ قالى أه ..
قلت له غريبة بس والله كويس إنـــــ...
لأقينا مرة واحدة الاب توب قفل كده لوحده D:
وبص لى بصة فيها معانى كتيرة اوى
وطبعا كان هايعيط لان ماعملش save ..
وانا كان منظرى وحــــــــــــــــــــــش ..
بس الحمد لله اللاب توب رأف بحاله ولقى الكتابة موجودة ..

وكتير وكتير من المواقف ..

ومش معنى كلامى ان كل حاجة تحصل فى حياتنا وحشة نرجعها للحسد ..

ولكن فى وسطنا فعلا ناس عينيهم وحشة وبتكون قلبها مليان حقد وغل وتحسد الناس التانين لأن معنى الحسد هو تمنى زوال النعمة من الغير ..

وفى ناس بتحسد من غير قصد .. وسمعت والله اعلم ان الانسان ممكن يحسد نفسه من غير ما يشعر .. بس مش متأكدة من المعلومة دى ..

فبقول لأى حد الله يكرمكم .. لما نشوف حاجة .. نقول بسم الله ما شاء الله مش هانخسر حاجة ..

طب والناس اللى خايفة من الحسد ..
فدول عليهم بأذكار الصباح والمساء خير حافظ من الحسد ..
وكمان الرقية الشرعية ..
وفى حادثة عن الحسد فى عهد الرسول صلى الله عليه وسلم تبين اهمية الرقية ..

(( أنه كان يوجد صحابي من الصحابة نظر لأخيه وهو يغتسل معه في بركة واحدة فلم يستطع أن يخرج من البركة، وظل نائمًا فيها من شدة العين حتى أتى النبي - صلى الله عليه وسلم – فرقاه ))

ربنا يحمينا جميعا من شر الحاسدين ..

***
وأنتم
كل حد يقول موقف من مواقف الحسد اللى شافها او حصلت معاه D:


ودمتم بخير ..

.. ضــريــبــة أم ..

فى ناس بتدفع ضريبة أفعال ناس تانية ..

زى الزوج والزوجة اللى بيتطلقوا بيدفع ضريبة الفعل ده الأولاد ..

الموضوع ده فكرنى بمثال كان أودامى ..

كان عندنا واحدة جارتنا وكان عندها ثلات أولاد وكانت اسرة متوسطة الحال ..

الأم بتشتغل والأب بيسعى علشان معيشة أفضل ..

كانت بنتهم رقم اتنين فى تانية ابتدائى .. وكانت من النوع الخواف جدا زى اى طفلة طبيعية فى سنها ..

ومدرستها قلبت نظامها مرة واحدة نظام مسائى .. وبقيت مفروض تنزل الساعة 11 صباحا والأم بتنزل شغلها من الصبح ..

كانت تسرح لها شعرها وتحضر لها اكلها وشنطتها وكل حاجة قبل ما تنزل ..

بس مجرد ما تنزل كنت اسمع بكاء البنت الشديد من خوفها لدرجة انها كانت تقعد تهبد على الحيطان والأرض من الساعة 8 لغاية الساعة 11 ..

الجيران اللى تحتهم اشتكوا لمامتها من التهبيد وانهم بيصحوا عليه ..

ومن ساعتها فعلا ما بقتش اسمع صوت تخبيط او تهبيد فى الحيطان بس بقيت اسمع صوت بكاء البنت عالى جدا .. زى كأنها مامتها ادتها الوصايا العشر ان على الله تعمل كده تانى فبدأت البنت تخرج ده فى البكاء ..

وصراحة مش عارفة هل ياترى الأم ممكن تكون عملت كده علشان الجيران فعلا ولا علشان تثبت انها ام مثالية وبتقدر تدير بيتها وتشتغل وعيالها شطار وزى الفل واحسن تربية وبيعرفوا يقعدوا لوحدهم ..

فضل الوضع كده شهور كل يوم اسمع بكاء البنت ومش قادرة اعمل حاجة لان علاقتنا ماكنتش قوية بوالدتها ..

لغاية ما فجأة سكت صوت البكاء وما بقتش اسمعه .. كنت بقول ياترى ايه السبب ؟؟ تكون المدرسة رجعت فترتها صباحية تانى ؟؟ بس كنت بشوف نور الشقة مولع ..

وفى مرة شفت نقّاش بيبيض باب شقتهم .. وفهمت السبب من بعدها ان البنت ما بقتش تعيط علشان حسيت بالامان وان فى حد معاها ..

استغربت انهم يسيبوا بنتهم مع راجل غريب حتى لو كانت صغيرة لكن عرفت بعد كده ان النقّاش ده صديق للعائلة جدا وصاحب عمها .. فمطمنين ..

فرحت جدا ان بكاءها اخيرا مش هاسمعه تانى لان فعلا كان بيتعبنى جدا وكنت بستغرب من الام ..

عدت الأيام وبدأت أحس إن فى حاجة مش طبيعية فى بيتهم .. عمام البنت عندهم .. حد داخل .. حد طالع ..

وعرفت السبب مؤخرا للأسف ..

إن النقّاش صديق العائلة المحترم كان كل يوم يجى ويشتغل وبعد ما يخلص شغل يتلكك باى حاجة انه يقولها هاتى اشرب او عاوز ادخل الحمام ويدخل الشقة ويتحرش بالبنت الصغيرة ..
وكان بيهددها بسكينة المعجون ان لو اتكلمتى هاموتك بدى ..

وكخيال طفلة كانت بتخاف وبتصدق ..

والأم اكتشفت بالصدفة بعد ما حسيت ان بنتها فيها حاجة مش طبيعة وهى نازلة الصبح لشغلها وقعدت تتضغط عليها لغاية ما قالت لها ..

قامت الدنيا وقعدت .. والأم وأب انقهروا على بنتهم ..

بس ياترى بعد ايه ؟؟

بعد ما بنوتة صغيرة كل اللى كانت بتتمناه انها تلاقى الامان وده طبيعى لوحده فى سنها ؟؟

بعد ما كانت زهرة جميلة لسه بتتطلع للحياة اول حاجة تقبلها ان واحد ماما وبابا فهموها ان ده عمو صاحبنا وبدأت تتطمن بيه انه يتحرش بيها ؟؟

ياترى ايه اللى استفدته الام بعد ما اتخلت عن وظيفتها الاولى وهى انها تكون ام ومصدر الامان لأولادها بوظيفتها التانية علشان الفلوس ؟؟

ياترى فلوس الدنيا تسوى اللى حصل لبنوتتها ؟؟

نظرة الانكسار اللى كنت بشوفها فى عين البنوتة كانت بتقتلنى انا شخصيا .. ياترى امها وابوها خدوا بالهم من النظرة دى ولا خدتهم دوامة الحياة تانى وما فكروش لحظة فى نفسية بنتهم وأثر اللى حصلها على نفسيتها ؟؟

وعلى فكرة انا مش ضد عمل المرأة .. لكن يكون بشروط ومن اهم الشروط دى أنها ما تقصرش فى حق بيتها ..

وبقول لكل أم ..

اتقى الله فى رعيتك .. ولا فلوس الدنيا تسوى حاجة وحشة تحصل لولادك ..
وتفضل مأثرة على نفسيتهم طول العمر ..
وممكن يكرهوكِ بسببها ..
وترجعى تبكى وتقولى عيالى قلوبهم قاسية عليا ..

قسوتهم ضريبة لإهمالك لهم من الأول ..

.. أم مــالــك عــندنــا ياهــلا ياهــلا..

ياجماعة خبر هام جداااا فى عالم التدوين ..
حيث أنه اليوم الموافق الثامن والعشرون من نيسان اللى هو أبريل اللى هو شهر اربعة فى السنة يعينى ..

فى تمام الساعة التاسعة إلا ربع حيث إنى كنت منغمسة فى طبق بامية من عمايل ايديا وحياة عينيا أنشأت أم مالك الغالية مدونتها واللى نورتنا بالتأكيد ..وده اللينك بتاعها
http://ommalek2009.blogspot.com/

يالا كله يروح يهنيها ويحطها عنده فى المفضلة وما يخرجش من المدونة الا على النوم وبس ..
فاهمين ؟؟؟

معلش انى لسه ما ردتش على التعليقات هارد عليها ان شاء الله بس قلت اعلن الاول عن النور اللى هل علينا فى التدوين ..

دمتم بخير ..